کہاں آ کے رُکنے تھے راستے، کہاں موڑ تھا، اُسے بُھول جا : kahan aa kay ruktay thay rastay kahan moor tha usay bhol ja

کہاں آ کے رُکنے تھے راستے، کہاں موڑ تھا، اُسے بُھول جا
وہ جو مل گیا اُسے یاد رکھ، جو نہیں ملا اُسے بُھول جا

وہ ترے نصیب کی بارشیں کسی اور چھت پہ برس گئیں
دلِ بے خبر مری بات سُن، اُسے بُھول جا، اُسے بُھول جا

میں تو گُم تھا تیرے ہی دھیان میں، تِری آس، تیرے گمان میں
صبا کہہ گئی مرے کان میں، میرے ساتھ آ، اُسے بُھول جا

کِسی آنکھ میں نہیں اشکِ غم، ترے بعد کچھ بھی نہیں ہے کم
تجھے زندگی نے بُھلا دیا، تُوبھی مُسکرا، اُسے بُھول جا

کہیں چاکِ جاں کا رفو نہیں، کسی آستیں پہ لہو نہیں
کہ شہیدِ راہِ ملال کا نہیں خوں بہا، اُسے بُھول جا

کیوں اَٹا ہوا ہے غبارمیں، غمِ زندگی کے فشار میں
وہ جو درج تھا ترے بخت میں، سو وہ ہو گیا، اُسے بُھول جا

نہ وہ آنکھ ہی تری آنکھ تھی، نہ وہ خواب ہی ترا خواب تھا
دلِ منتظر تو یہ کس لیے، ترا جاگنا، اُسے بُھول جا

یہ جو رات دن کا ہے کھیل سا، اسے دیکھ، اس پہ یقین نہ کر
نہیں عکس کوئی بھی مستقل، سرِ آئینہ، اُسے بُھول جا

جو بساطِ جاں ہی اُلٹ گیا، وہ جو راستے سے پلٹ گیا
اُسے روکنے سے حصول کیا، اُسے مت بُلا، اُسے بُھول جا

تو یہ کس لیے شبِ ہجر کے اُسے ہر ستارے میں دیکھنا
وہ فلک کہ جس پہ ملے تھے ہم، کوئی اور تھا، اُسے بُھول جا

تجھے چاند بن کے مِلا تھا جو، ترے ساحلوں پہ کِھلا تھا جو
وہ تھا ایک دریا وصال کا، سو اُتر گیا، اُسے بُھول جا

امجد اسلام امجد

kahan aa kay ruktay thay rastay kahan moor tha usay bhol ja
wo jo mil gya usay yaad rahk jo nahi mila usay bhol ja

wo teray naseeb ki baarishian kisi aur chat per bars gyain
aay dil! Bekhabar meri baat sun usay bohl ja usay bhol ja

main tu gum tha teray hi dehaan main teri aas teray guman main
saba keh gyai meray kaan main meray saath aa usay bhol ja

kisi aankh main nahi ashk gum, teray baad khuch bhi nahi hai kum
tujhay zindgi nay bhula dya tu bhi muskara usay bhol ja

kahin chak jaan ka rafoo nahi kisi aastin pe laho nahi
keh sheheed rah milal ka nahi khoon baha usay bhol ja

kyion ata hua hai ghubar main gum zindgi kay fishar main
wo jo darj tha teray bakht mein so wo ho gya usay bhol ja

na wo aankh hi teri aankh thi na wo khawaab hi tera khawaab tha
dil muntazaar tu ye kis lyae hai tera jagna usay bhol ja

ye jo raat din ka hai keehl sa usay dehk us pe yaqeen na ker
nahi aaks koi bhi mustaqil ser-e-aainah usay bhol ja

jo basaat jaan hi ult gya wo jo rastay se palat gya
usay roknay se hasool kyia usay mat bula usay bhol ja

tu ye kis lyae shub hijar kay usay her sitaray main dekhna
wo falak keh jis pe milay thay hum koi aur tha usay bhol ja

tujhay chand bun kay mila tha jo baray sahilon pe kihla tha jo
wo tha aik darya wasaal ka so utar gya usay bhol ja

کیا آپ کو یہ غزل پسند ای اپنے comments کے ذریے ہمیں بتایں

Categories: Amjad Islam Amjad , Ghazlain , اردو