Ab aye meray ehsaas-e-junoon–kia mujhey daina?

Ab aye meray ehsaas-e-junoon–kia mujhey daina?
Darya usay bakhsha hai tu sehra mujhey daina

Tum apna makaan jab karo taqseem tu yaaro
Girti hui deewar ka saaya mujhey daina

Jab waqt ki murjhaai hui shaakh sambhaalo
Us shaakh say toota hua lamha mujhey daina

Tum mera badan ohrh kay phirtay raho-LEKIN
Mumkin ho tu ek din mera chehra mujhey daina


Choo jayee hawa jis say tu khushboo teri aye
Jaatey huay ek zakhm tu aisa mujhey daina

Ek dard ka mela hai–laga hai dil-o-jaan mein
Ek rooh ki awaaz k rsta mujhey daina

Ek taaza ghazal izn-e-sukhan maang rahi hai
Tum apna mehekta hua lehja mujhey daina

Wo mujh say kahin barh k musibat main tha *Mohsin*
Reh reh k magar uska dilaasa mujhey daina.

Categories: Ghazals , Ghazlain , Mohsin Naqvi , Nazmain , Roman poetry , sad poetry poems